Tirana e nis në maksi mum, fiton derbin me Dinamon në një ndeshje ku blutë e rikthyer në Superiore paraqiten në mënyrë dinjitoze, para nënkampionëve të Shqipërisë. “Panorama Sport” sjell për lexuesit disa nga momentet më pikante nga derbi, i cili u zhvillua në “Elbasan Arena”.

– Luixhi di Biaxho dhe Orges Shehi u panë shumë të përfshirë në ndeshje që gjatë nxehjes. Edhe kur po bën thjesht veprime shtrydhëse preferuan të qëndronin pranë skuadrës së tyre dhe t’i shihnin nga afër. Më pas të dy trajnerët janë takuar para nisjes së takimit, ku pasi shkëmbejnë disa batuta shtrëngojnë duart me njëritjetrin.

– Para startit të sfidës u mbajt edhe një ceremoni në nder të dy ish-lojtarëve dinamovitë që i dhanë fund futbollit, Sabien Lilajt dhe Edvan Bakajt. Mesfushori lë karrierën pas plot 533 takimesh, ndërsa portieri luajti 260 ndeshje.

– I pranishëm në stadium, përpos dy presidenteve, ishte edhe Igli Tare. Sakaq, në pushim të pjesëve, Halili dhe Bardhi qëndruan në kateringun e stadiumit dhe konsumuan diçka së bashku.

– Di Biaxho ngre duart lart dhe kërkon penallti që në minutën e 6-të te rasti i Zabërgjës, por nuk ishte i këtij mendimi kryesori Xhaja, i ciki vijon lojën. Ai kërkon vazhdimisht edhe ndihmën e Memushajt për t’i dhënë udhëzime lojtarëve. “7 orë ia kam shpjeguar”, bërtet tekniku, kur po shihte se lojtarët nuk po i bindeshin. Në një moment tërbohet aq shumë sa ulet në pankinë dhe lë Memushajn të japë udhëzime.

– Hila mërzitet me Kainën në minutën e 32-të, teksa braziliani kapi topin para tij dhe humbi rastin flagrant, në një kohë që elbasanasi priste mbrapa. Shkëmbyen disa fjalë midis tyre.

– Tifozët e Tiranës i tërbon një pozicion jashtë loje në dëm të ekipit të tyre, ku prisnin që së paku të lihej avantazhi, pasi bëhej fjalë për aksion me rrezikshmëri.

– Edhe pse portierët nuk shquhen shumë për teknikë, Orges Shehi tregoi klas në kapjen e një topi me këmbë, që po shkonte drejt pankinës së tij.

– Regi Lushkja tregohet “fair play”, teksa në një aksion premtues të të tijve, nxjerr topin jashtë vijave kufizuese, pasi një lojtar i Dinamos ishte i shtrirë në zonën e Likës. Pati edhe pakënaqësi në kampin bardheblu, për aq kohë sa arbitri vazhdonte lojën, nuk kishte pse ndalte aksionin.

– Në minutën e 56-të Luigji di Biaxho ndëshkohet me të verdhë nga Xhaja dhe ky i hakërrehet Rustës, pasi ajo e njoftoi. “Mua më flet, ndërsa atij jo”, duke drejtuar gishtin nga Orges Shehi. Debat që vijon për disa kohë midis të dyve.

– Albion Marku kërkon pak më shumë entuziazëm nga tifozët blu, duke ua bërë me duar në të 65-ën që t’i mbështesin sa më shumë.

– Në kampin dinamovit kanë qenë të tërbuar me penalltitë në disfavor, ku kishin dy kundra. Dukshëm në fytyrat e drejtuesve dhe presidentit shihej mërzitja.

PANORAMASPORT.AL

NDIQE LIVE "PANORAMA TV"

---