“Panorama Sport” ju sjell disa nga momentet pikante të ndeshjes së Kupës së Shqipërisë mes Partizanit dhe Apolonisë, e zhvilluar dje në stadiumin “Arena e Demave”.

* Për të dytin edicion radhazi, Partizani eliminon Apoloninë nga Kupa e Shqipërisë në turin e tretë. Fitoren me rezultatin 2-0 e vendosën golat e Kekos, që për herë parë shënon dopietë te “demat”.

* Partizani zgjedh të luajë me fanellën e tretë, atë të zezë edhe pse është klubi pritës në stadiumin “Arena e Demave”. Kjo zgjedhje rezulton fatsjellëse, pasi merr fitoren e parë të vitit 2025.

* Në pjesën e parë dalin në nxehje vetëm lojtarë të Partizanit. Fierakët janë disi të cunguar në stol. Ndërsa po kryejnë bashkë dy zëvendësimet e para, stoli për një moment duket bosh.

* “E fjetur”. Ky është epiteti që i shkon pjesës së parë ku portierët nuk testohen. Mungesa e atmosferës në stadium e bën po ashtu një ndeshje “të fjetur”.

* Keko shënon dy herë në harkun kohor të 16 minutave të pjesës së dytë. Festa për golin e dytë, që sjell njëfarë qetësie, është edhe më e madhe. Keko vendos të përshëndetet dhe me një pjesëtar të stafit që kujdeset për bazën materiale.

* Edhe pse të kuqtë janë në avantazhin e dy golave, Veselinoviç shfaqet nervoz me skuadrën në dy momente. Fillimisht me Qirkon, që vendos të largojë topin e pasuar në zonë. “Me qetësi”, i drejtohet trajneri serb portierit, nga i cili kërkon të mos nxitohet. Më pas radhën e ka Ismaili, nga i cili zhgënjehet për një pasim prapa te Qirko, kur topin e zotëronte në mesfushë.

* Dëmtim i rëndë për Qirkon, i cili përplaset në zonë me sulmuesin e Apolonisë. Të dy lojtarët kanë nevojë për ndihmën e stafit mjekësor dhe shokët e skuadrës mblidhen afër tyre. Qirko nuk mund ta vazhdojë lojën dhe largohet me barelë nën shoqërimin e duartrokitjeve. Portieri i Partizanit transportohet në spital.

* Vendin e tij e merr Alban Hoxha, për të dytën ndeshje këtë sezon, ku Qirko dëmtohet. Hoxha merr po ashtu duartrokitje nga publiku i pranishëm. Shiriti i kapitenit kalon nga Preka te cërrikasi.

* Atmosferë e ngrohtë te “demat” në të ftohtin e janarit, pas kualifikimit në çerekfinale. Bytyçi nuk zbret te dhomat e zhveshjes, pasi disa tifozë e presin në tribunën “VIP”. Në fund dhuron fanellën, që mbajti si titullar pas gjashtë ndeshjesh.

* Te Partizani debutuan në ndeshje zyrtare si zëvendësues sulmuesi sirian Mando dhe mesfushori Jata. Të dy këta, pjesë e Partizanit B.

EMANUEL LOCI-PANORAMASPORT.AL

NDIQE LIVE "PANORAMA TV"

---