Pranë asaj të Mesit dhe Iniestës, tashmë fanella e Pikesë gjendet në muzeun e Barcelonës
Qendërmbrojtësi i Barcelonës Zherard Pike tashmë i dalë në pension është takuar me presidentin e klubit Joan Laporta në Museu Núñez në Camp Nou. Pike ka dorëzuar në muze fanellën me të cilën luajti ndeshjen e tij të fundit kundër Almerias.
“Është një moment historik dhe shumë simbolik, sepse një nga heronjtë e Barcelonës, e lë fanellën në Muze. Është një nder që mund ta ndaj me Zherard Pike”, u shpreh Laporta.
Pike ndau emocionet e tij për faktin që fanella e tij do të ishte pranë atyre të ish-bashkëlojtarëve të tij tek Barcelona, Lionel Mesi dhe Andres Iniesta.
“Unë ndaj hapësirën me Mesin dhe Iniestën, kjo vitrinë qenka shumë e lezetshme. Jam shumë krenar dhe i lumtur që njerëzit që vijnë në Muze mund ta shohin fanellën”, tha Pike pasi e dorëzoi atë.
Me dedikimin ‘Semper junts’ (‘Gjithmonë bashkë’), Pike nënshkroi llastikun me numrin e tij 3.
PANORAMASPORT.AL
