Trajneri i Realit të Madridit, Karlo Ançeloti ka folur për mediat para takimit të së dielës kundër Vajadolidit. “Los Blancos” do të bëjnë prezantimin e tyre të parë në këtë sezon para publikut madrilen.Njëherazi, ndeshja kundër Vajadolit do të jetë e para dhe për Mbape me fanellën e Realit në Madrid. Ançeloti ka prekur shumë tema, duke i vënë kapak dhe debateve të shkaktuara nga ankesat e Rodrigos, duke sqaruar se braziliani është i lumtur në Madrid.

Të dielën prisni Vajadolidin në “Bernabeu”, tre muaj nga ndeshja e fundit. Si ju duket?

Është gjithmonë kënaqësi e veçantë të luajmë në stadiumin tonë. Ne duam të kthehemi, sepse nuk kemi luajtur atje për një kohë të gjatë dhe duam të japim një imazh të mirë, të fitojmë ndeshjen dhe të kemi një ditë të lumtur.

A është ideja e njëjtë me Majorkën, por të luash më mirë?

Jemi përgatitur më mirë për ndeshjen e së dielës këtë javë. Ne kemi punuar në ato aspekte që nuk shkuan mirë kundër Majorkës. E kuptuam shumë mirë atë që ndodhi atje dhe jemi përpjekur ta rregullojmë këtë javë. Kundër Vajadolidit do të jetë një provë e mirë.

Çfarë mësuat nga ai barazim?

Thelbi është atë çfarë thashë pas ndeshjes. Na mungonte ekuilibri ndonjëherë dhe duhet të punojmë për këtë. Nuk është aq e komplikuar të gjesh zgjidhjen. Kur problemi është i qartë, ka edhe një zgjidhje të qartë.

Këtë javë u shfaq një mesazh nga Rodrigo, që dukej disi i pezmatuar për lënien e tij në harresë… A keni folur me Rodrigon për këtë diskutim?

Unë kam folur me të këtë javë dhe e pyeta nëse kishte ndodhur diçka. Më tha se mesazhi ishte fals, se nuk kishte thënë asgjë. Ai është i lumtur këtu dhe po punon shumë mirë. Ai ka qenë një nga më të mirët në këto dy ndeshjet e para. Nuk ka asnjë problem me të.

Sa i rëndësishëm është roli i Rodrigos për ekipin? Çfarë kontribuon ai përtej synimeve?

Të gjithë e dimë se çfarë cilësish ka. Në dy ndeshjet e para të sezonit ai është paraqitur shumë mirë: shënoi kundër Majorkës dhe kontribuoi shumë kundër Atalantës. Kur kemi një ekip kaq sulmues, sulmuesit duhet të punojnë pak më shumë dhe ai po bën shumë mirë.

E keni thënë disa herë se merkato është e mbyllur për ju, por a nuk është e rrezikshme të mos kërkoni një qendërmbrojtës tjetër?

Jo, sepse kemi burime në këtë repart. Të rinjtë që kemi janë shumë të mirë si Asensio dhe si urgjencë kemi edhe Tçuamenin. E presim Alabën me qetësi.

Ju duket normale të luani më 25 gusht në orën pesë pasdite?

Ne luajmë kur na thonë të luajmë dhe ku na thonë të luajmë. E vërteta është se duhet të kemi parasysh shëndetin e lojtarëve dhe asgjë tjetër.

Si do ta presë “Bernabeu” Mbapenë?

Mendoj se do të jetë një ditë e bukur për Mbapenë, duke luajtur për herë të parë në “Bernabeu” me fanellën e Realit të Madridit. Fansat janë shumë të emocionuar për të, tifozët do ta shijojnë atë

LEDJO SEFERKOLLI-PANORAMASPORT.AL

NDIQE LIVE "PANORAMA TV"

---