Rikthehet Kupa FA, bonus financiar edhe për humbësin. Turneu 154-vjeçar ndryshon rregullin për herë të parë
Humbësit e raundit të tretë të Kupës FA do të marrin shpërblimin e vendosur për herë të parë ndërsa Kupa FA nisi raundin e saj të tretë mbrëmjen e djeshme.
Të 32 skuadrat e eliminuara në fazën e fundit të 1/32-tave do të paguhen me 25,000 paund nga fondet e “Uembli”-t, ndërsa secili prej ekipeve fituese do të përfitojë 115,000 £. Shefat e Federatës Angleze ranë dakord për pagesat ekstra në mënyrë që të kompensojnë klubet për heqjen e të gjitha përsëritjeve nga raundi i parë. Skuadrat humbëse në raundin e parë dhe të dytë fituan respektivisht 15,000 dhe 20,000 £.
Megjithatë, ndeshjet e kësaj fundjave do të jenë të fundit këtë sezon që do të aplikohet një çmim ngushëllimi financiar. Shuma totale e shpërblimit që ofrohet nga raundi i parë e tutje është rritur me 2.44 milionë £, duke shkuar në 20.3 milionë £. Por shumica e parave shtesë do të shkojnë për klubet e ligave më të ulëta. Dhe nuk ka asnjë ndryshim në shpërblimet financiare për ekipet fituese nga raundi i katërt e tutje. Fituesit e finales së kompeticionit më të vjetër futbollistik në botë, që do të mbahet në maj në “Uembli”, do të arkëtojnë gjithsej 3.91 milionë £, vetëm 10,000 £ më shumë se Mançester Junajtid, që fitoi trofeun se zonin e kaluar.
Kjo shifër krahasohet me 6,795 milionë paundët që Arsenali mori për fitoren e tyre në finalen me dyer të mbyllura kundër Çelsit në 2020. Ndikimi i pandemisë në financat e “Uembli”-t pa një reduktim të ndjeshëm në bonuset financiare të Kupës FA. Kjo shifër është rritur vetëm pak gjatë katër sezoneve të mëpasshme. 12 klubet e përfshira në ndeshjet e raundit të tretë të përzgjedhur për t’u transmetuar drejtpërdrejtë nga “BBC” dhe “ITV” – përfshirë Tamuorthin, i cili pret Totenhemin të dielën, do të marrin të gjitha 85,000 £.
Përveç kësaj, duke u transmetuar në shërbimet “BBC iPlayer” dhe “Red Button” Evertoni, Peterborou, Lidsi, Harrogejti, Njukasëlli dhe Bromlej do të arkëtojnë 40,000 £ secili. Ndërsa Shefilld Junajtid, Kardifi, Sauthemptoni dhe Suonsi do të marrin nga 48,000 £ secili nga mbulimi i “BBC Wales”.
ANDROKLI DRALO-PANORAMASPORT.AL
NDIQE LIVE "PANORAMA TV"
