Vora i rikthehet fitoreve në kampionat pas barazimit në Rrogozhinë me Besën. Fitorja 2-0 me Burrelin kishte përsëri si protagonist lituanezin Manfredas Ruzgis, që me golin shënuar arriti në kuotën e 6 golave.

Vora është e ndërtuar për të mundur çdo ekip dhe humbja aksidentale me Flamurtarin është harruar dhe pritet që të rikuperohet në ndeshjen e kthimit me vlonjatët, që do ta luajë në shtëpi, ku edhe pritet që ekipi të shpallet kampione e dimrit. Jurgen Vrapi me golin e tij hapi siparin e fitores së vorakëve kundër Burrelit. Për “Panorama Sport” Vrapi u shpreh: “Ishte një gol që solli qetësinë e skuadrës. Jam i lumtur që po arrij të shënoj. Tashmë kam ndryshuar rolin, pasi jam një mbrojtës. Gjithsesi, nuhatja nuk më mungon. Nuk ka rëndësi nëse shënoj unë apo dikush tjetër, rëndësi ka vetëm fitorja dhe pikët.

Secili prej nesh duhet ta bëj këtë, pasi si detyrim ndaj fanellës që mbajmë veshur. Qëllimi i vetëm është ngjitja në elitë. Tashmë vëmendja jonë është përqendruar te ndeshja e së dielës kundër Erzenit në Shijak, që duket si një derbi për shkak të afërsisë. Për Vorën nuk ka dallime mes kundërshtarëve, të gjithë duhen mundur me radhë. Këtë duhet ta bëjmë edhe në Shijak kundër Erzenit. Respekt për skuadrën shijakase dhe keqardhje që gjendja e tyre është e tillë, por ne shohim detyrat dhe  punën tonë. Na duhen pikët dhe shpresoj të shënoj sërish.

Vora nuk do të ndalet deri në ngjitjen në Superiore. Do të mundim çdo ekip, që na del përpara”. Vora pas fitores me Burrelin u katapultua në vend të parë, por fitorja e Flamurtarit dje në kohë shtesë ndaj Lushnjës, bëri që të besuarit e trajnerit Arian Bellai të zbresin në vendin e dytë. Gjithsesi, javë në vazhdim mund të flasë për Vorën, duke ditur që distanca me vlonjatët është vetëm dy pikë dhe Flamurtari do të luaj në transfertë ndaj rivalit tjetër, Besa e Kavajës. Gjithsesi, kreu mes kësaj tresheje pritet që të vendoset nga përballjet direkte mes tyre.

ABDULLA DUSHKU – PANORAMASPORT.AL

NDIQE LIVE "PANORAMA TV"

---