Disa muaj më parë Gjykata e Arbitrazhit Sportiv në Lozanë vendosi në favor të Federatës Shqiptare të Futbollit, duke pranuar pretendimet e FSHF-së për shkeljet e bëra në Asamblenë e 23-të të Jashtëzakonshme të KOKSH, e mbajtur më 10 janar 2021.

KAS i shpalli të pavlefshme vendimet e mbajtura në atë asamble, ku përfshihen ndryshimet në statutin e Komitetit Olimpik, shkarkimi i presidentit Viron Bezhani apo zgjedhja e anëtarëve të rinj të komisionit të verifikimit. Pretendimet për parregullsi në asamblenë janarit 2021 sollën asokohe edhe tërheqjen e Prof. Dr. Artan Shytit nga gara për president të KOKSH, kandidaturë, të cilën e kishte propozuar pikërisht federata më e madhe në vend, FSHF-ja.

Në një intervistë për “Panorama Sport”, Shyti flet si person i interesuar drejtpërdrejt në zgjedhjet e KOKSH. Ai komenton atë që po ndodh në Komitetin Olimpik, institucion që po injoron vendimin e Lozanës, shkallës më të lartë të drejtësisë. Shyti e quan skandal këtë situatën, teksa deklaron se drejtësia në Shqipëri vazhdon të shkojë pas interesave të individëve. Për ish-zv.ministrin e sportit, mosrespektimi i vendimit të KAS-it është diçka edhe më e rëndë se vetë shkelja me asamblenë, pasi tani sipas tij kemi të bëjmë me bashkëpunim në krim.

Shyti, që prej qershorit kemi një vendim nga KAS i Lozanës që i dha të drejtë FSHF-së pas ankimimit për paligjshmërinë e asamblesë së janarit 2021 të Komitetit Olimpik. Megjithatë në KOKSH vijon puna sikur mos të ketë ndodhur asgjë. Cili është komenti juaj për këtë situatë?
Nëse flasim për reformën në drejtësi, për respektimin e drejtësisë, etj., ky është një tregues i qartë që jo në çdo fushë kjo gjë funksionon. Të paktën në sport kjo nuk funksionon. Drejtësia në këtë rast është vënë në shërbim të interesave individuale dhe shteti është bërë avokat i shkeljes së ligjit dhe i vendimeve të drejtësisë. Të thuash që KAS-i duhet certifikuar në apel është njësoj si të thuash Strasburgu për pronat duhet certifikuar në gjykatë të lartë. Kjo është absurde. Këtu kemi rastin konkret, në të cilin ka mbaruar shqyrtimi në Shqipëri dhe çështja ka shkuar në KAS, në organin më të lartë. Nuk mund të certifikojë apeli në Shqipëri një vendim të KAS-it që është vendim përfundimtar. Çfarë është kjo që deklarojnë, që duhet të presim ne se çfarë do të thotë apeli në Shqipëri?! Kjo është thjesht për të fituar kohë dhe ky është një skandal me përmasa të paimagjinueshme.

Ndërkohë KOKSH ka mbajtur një asamble pas vendimit të KAS-it, madje ka në plan gjithashtu një tjetër në tetor. Si i shikoni këto lëvizje nga Komiteti Olimpik dhe a mundet që t’i zhvillojnë, kur kemi një vendim të qartë nga gjykata e Lozanës?
Absolutisht që jo. Ministria e Sportit që është edhe vigjilentja e ligjit, duhet të reagojë, t’i thërrasë dhe t’u thotë që duhet rifilluar atje ku është lënë, duke anuluar asamblenë në të cilën është shkarkuar pa të drejtë Viron Bezhani. Asambleja që ndryshoi statutin dhe hoqi Vironin është e paligjshme, këtë thotë vendimi i gjykatës. Kështu që duhet të kthehemi në pikën ku Bezhani merr fuqinë për të bërë zgjedhje. Kjo që po ndodh është tregues që përsëri drejtësia në Shqipëri shkon mbas interesave personale të individëve. Komiteti Olimpik ka një president që del dhe pa asnjë lloj përgjegjshmërie thotë se pavlefshmëria e asamblesë nuk e cenon në zgjedhjen e tij në drejtim të KOKSH, në një kohë kur gjithçka është e qartë që në momentin që del i pavlefshëm shkarkimi i presidentit të asaj kohe, që ishte Viron Bezhani. Gjithçka duhet të rikthehet në atë moment. Pra duhet të zgjidhet ai ngërç dhe nuk mund të sillemi sikur s’ka ndodhur asgjë dhe hajde të vazhdojmë përpara. Si mund të thuash që nuk më intereson për KAS-in, për gjykatat ndërkombëtare, për Strasburgun?! Si mund të thuash që ne vazhdojmë punën?! Është njësoj si ta fitosh pronën me ligj dhe të thonë nuk ta japim, punë e madhe. Është e njëjta gjë. Kemi një president të KOKSH që deklaron se nuk di gjë për atë asamble, sepse ka qenë deputet! Por kjo nuk është aspak e vërtetë, pasi ka marrë pjesë aktive në caktimin dhe organizmin e asaj asambleje. Ka ndikuar në asamble, ka mbledhur firmat për të shkarkuar Viron Bezhanin. Por kur të del e paligjshme kjo gjë nuk mund të thuash që nuk kam gisht dhe se ka ndikuar zero në zgjedhjen time president.

Si e shikoni përfshirjen në institucionet sportive të njerëzve që vijnë nga politika?
Në momentin që një deputet shkon dhe zgjidhet president i KOKSH-it, pasi Fideli ishte akoma deputet kur u bë president, shpjegohen shumë gjëra që ndodhën më pas. Dhe po flasim për një deputet të maxhorancës, që aty fillon deviacioni. Nuk është normale që në një organizatë sportive gjithëpërfshirëse, një deputet i një force politike të shkojë e të bëhet president. E gjithë kjo që ka ndodhur u bë për ndryshimin e statutit dhe lejimin e kandidimit, pasi kjo gjë më parë nuk lejohej. Pra duhet që të ikte Vironi, të ndryshohej statuti që të lejohej që deputeti të bëhej president. Kjo gjë solli pikërisht atë që ne kishim frikë, pasi rezultoi që ndikimi politik nganjëherë dëmton dhe në këtë rast ashtu ndodhi. Pesha politike e presidentit, pra e deputetit, po deformon vijueshmërinë normale të punës. Në momentin që shkon çështja në gjykatë dhe gjykata vendos, ti nuk mund të thuash që nuk pyes. Pse nuk pyet ti? Çfarë force të mbinatyrshme ke që nuk pyet, përveçse të kaluarës politike, e cila të shërben si mburojë që të mos respektosh vendimet e gjykatës. Këtu ne akoma themi që meqenëse është Fideli, ne nuk pyesim sepse e kemi shok dhe mik. Por çfarë lidhje ka kjo?! Këtu nuk bëhet fjalë për çështje individësh, por çështje normash statutore dhe drejtësie që krijojnë precedentin që gjithçka mund të bëhet si t’i teket atij që ka fuqinë.

Ju ishit kandidat për president të KOKSH, por u tërhoqët…
Unë isha kandidat i Federatës Shqiptare të Futbollit për president i Komitetit Olimpik. Ne nuk shkuam në asamble, pasi e konsideruam të paligjshme, ndërsa ata vazhduan zgjedhjet. Por tani, në këtë moment kur vërtetohet nga gjykata që asambleja ishte e paligjshme, minimalisht mua mund të më jepet e drejta që nëpërmjet FSHF-së të kandidoj dhe të futemi në një proces zgjedhjesh aty ku u la. Por këtu vazhdojnë çudirat dhe si mund të sillesh sikur nuk ka ndodhur asgjë?! I bëre zgjedhje dhe u zgjodhe i vetëm sepse federata më e rëndësishme që kishte caktuar një kandidat të sajin për president, u tërhoq. Gjithashtu u tërhoqa edhe unë sepse nuk ishte një proces i ligjshëm dhe kjo gjë u vërtetua nga KAS. Të paktën duhet të ribëhen zgjedhjet edhe një herë me ato dy kandidatura që ishin, Fidel Ylli dhe unë, pra minimalisht duhet bërë kjo. Ne shprehëm të gjitha pretendimet tona për paligjshmërinë e atij procesi, por na i mohuan, na bllokuan dhe bënë të pamundurën për të na penguar. Këmbëngulja e FSHF-së për të vendosur drejtësi, për të cilën duhet përgëzuar, rezultoi me një vendim që është për tu zbatuar. Insistimi për të mos respektuar vendimin nga KAS është më i rëndë se shkelja me asamblenë, sepse tani do të thotë që kemi të bëjmë me bashkëpunim në krim.

Çfarë prisni tashmë që të ndodhë?
Pres që edhe në sport vendimet e organeve të drejtësisë të zbatohen dhe të respektohen siç po ndodh për fat të mirë në fushat e tjera. Pres që institucionet të ngrihen në lartësinë e përgjegjësive dhe të sigurojnë funksionim normal të sistemit sportiv.

ARTIN LLESHAJ – PANORAMASPORT.AL

NDIQE LIVE "PANORAMA TV"

---