Pedri po përjeton një nga momentet më të mira të karrierës së tij. I shoqëruar nga dëmtimet e njëpasnjëshme, mesfushori nga ishujt Kamarie ka gjetur gjithnjë mundësinë të ringrihet, madje edhe më i fortë.

Në këtë sezon, 21-vjeçari spanjoll ka marrë pjesë në të njëmbëdhjetë ndeshjet e La Liga-s dhe tri ndeshjet e Champions-it. Ai numëron tre gola të shënuar, por aty ku spikat më shumë është aftësia e tij për krijimtari. Talenti i tij për të kombinuar është i jashtëzakonshëm.

Ish-lojtari i Las Palmas është zgjedhur si futbollisti më i mirë nën 23 vjeç i muajit tetor. Ai ishte titullar në tre ndeshjet e luajtura: kundër Alavesh, Seviljes dhe Realit të Madridit. Ai përfundoi të plotë të parën dhe u zëvendësua në minutën e 83-të kundër andaluzëve dhe në minutën e 87- të në “El Clasico”.

Në këto angazhime ai kishte mesatarisht 58 pasime për ndeshje me një saktësi pasimi prej 90.86%. Praktikisht, mesfushori i Barcelonës është në kufijtë e perfeksionit. Hansi Flik është më se i kënaqur me paraqitjen dhe rendimentin e tij dhe e konsideron të paprekshëm në mesfushë.

Këtë sezon, për shkak të nevojave, ai po luan disa metra më i tërhequr se zakonisht. Por kjo nuk e ka penguar atë të shfaqë të gjithë talentin e tij. Edhe në këtë pozicion më të tërhequr, ai ka qenë i shkëlqyer, duke qenë një nga lojtarët më aktivë në La Liga me 539 pasime.

PANORAMASPORT.AL

NDIQE LIVE "PANORAMA TV"

---