Alehandro Garnaço ka rrezikuar zemërimin e Erik ten Hagut duke pëlqyer një postim në “Instagram”. Anësori i Mançester Junajtid ka pëlqyer një postim të gazetarit italian Fabricio Romano, që përshkruan kritikat e fundit të Kristiano Ronaldos ndaj menaxherit të “Djajve të Kuq”, Ten Hag.

Në një intervistë të fundit, portugezi pretendoi se Mançester Junajtid duhet të rindërtohet dhe vuri në dyshim deklaratën e Ten Hagut, i cili tha klubi nuk mund të konkurrojë për titullin. Periudha e dytë e Ronaldos në “Old Trafford” mori fund në vitin 2022 pas një mosmarrëveshjeje me Ten Hag.

Ylli portugez reflektoi edhe për largimin e tij nga “Teatri i Ëndrrave” në një intervistë për Rio Ferdinandin. “Trajneri i Mançester Junajtid nuk mund të thotë se nuk mund të konkurrojnë për të fituar Premier Ligën dhe Ligën e Kampioneve çdo vit. Ky është Mançester Junajtid! Duhet të jesh aty, të thuash ‘dëgjo, ndoshta nuk e kemi atë potencial, por këtë nuk mund ta them. Ne do të përpiqemi. Ju duhet të provoni’. Kjo është arsyeja pse Junajtid duhet të rindërtohet”, tha CR7.

Ronaldo vazhdoi duke sugjeruar se tekniku holandez duhet të marrë këshilla nga ndihmësi i tij, Rud van Nistelroi, për vlerat e klubit.

PANORAMASPORT.AL

NDIQE LIVE "PANORAMA TV"

---