Qeveria nuk ka bërë ende asnjë reagim për bastet sportive online në Shqipëri, edhe pse ato janë bërë të ligjshme që prej datës 1 prill 2024. Pak ditë më parë “Panorama Sport” publikoi një artikull në lidhje me zvarritjen që po i bëhet rikthimit të basteve, pasi diçka e tillë ka sjellë pasoja në shumë qytetarë. Strukturat përkatëse morën përsipër që për një afat 6 mujor, kompanitë të fillojë punën në vendin tonë.

Por, deri tani nuk ka asnjë lëvizje në lidhje me hapjen e tyre dhe ngritjen e strukturës për të mundësuar dhënien e licencave tek ato kompani që janë të interesuara për të operuar në Shqipëri. Diçka e tillë është kthyer problem në kohët e fundit, pasi policia vijon me aksionet kundër atyre që ushtrojnë këtë aktivitet, si edhe shumë qytetarë janë shoqëruar në komisariat për vënie bastesh.

Diçka e komplikuar pasi mund të ketë shumë njerëz që mendojnë se bastet janë bërë të ligjshme, sepse ashtu kanë dëgjuar. Ndërkohë ata janë duke luajtur ende në të zezë, pasi Komisioni i Licencave (struktura që do të ngrihet për të dhënë 10 licenca në Shqipëri) nuk është ngritur ende. Kjo sepse pesë nga shtatë anëtarët caktohen nga ministritë përkatëse si Ministria e Brendshme, Financave, Ekonomisë, Çështjeve Sociale dhe Drejtësisë.

Në këtë drejtim gjithçka po zvarritet dhe me ndryshimet e fundit në kupolat drejtuese të këtyre ministrive, ky proces vështirë se do të shkojë drejt një zgjidhje dhe nuk dihet se kur do të marrë fund vendosja e një basti në të zezë.

PANORAMASPORT.AL

NDIQE LIVE "PANORAMA TV"

---