Besa do të presë sot, ora 14:00, Flamur tarin në një përballje që do të zhvillohet në një stadium me kushte dhe terren ideal, sikurse ai i Egnatias.

Besa vjen pas asaj fitore të thellë në Kukës, 5–0, ndërsa Flamurtari pas fitores dramatike në shtesë ndaj Lushnjës. Me fitoren e Vorës në Shijak, tashmë të dy ekipet, si ai kavajas ashtu edhe ai vlonjat, do të synojnë fitoren për të mos humbur terren me kreun. Për verdhezinjtë ajo vlen më shumë, pasi nuk do lejonin Vorën të shkëputej 4 pikë dhe kryesorja, luajnë në shtëpinë e tyre.

Të dy ekipet janë ndër klubet me më shumë histori në Superiore, ndaj pritet që kjo përballje të shihet edhe si një reklamë e Kategorisë së Parë. Për trajnerin Mirel Josën pritet të jetë një përballje e vështirë, ku çdo shpërqendrim mund të kushtojë.

“Kur ndeshen dy klube si Flamurtari dhe Besa, kushdo pret një ndeshje të fortë, të bukur, në mënyrë që edhe tifozët të shijojnë vërtet një duel pretendentësh. Në këtë kuptim, të dy klubet kanë në përbërje futbollistë me përvojë në Superiore dhe që janë të aftë të ndëshkojnë në çdo gabim. Ndaj, u kam kërkuar lojtarëve të mi të kenë përqendrim maksimal në çdo fragment të lojës dhe të kenë kujdes. Në situatën që ndodhet Besa, natyrisht që ne do të synojmë fitoren. E thashë edhe më lart, që do të jetë një përballje jo e lehtë. Unë pres që lojtarët e mi të bëjnë lojën e tyre dhe e vetmja porosi shtesë ka të bëjë me pragmatizmin para portës. Ndaj çdo ekipi ne kemi arritur të dalim lirshëm dhe me shumë raste shënimi. Nëse kemi marrë 3 barazime, kjo ka ardhur vetëm për shpërdorim të rasteve të shënimit. Përballë një ekipi si Flamurtari, kjo mund të kushtojë më shumë”, u shpreh trajneri i skuadrës kavajase, Mirel Josa, për “Panorama Sport” .

Në mbështetje të Besës në Rrogozhinë pritet të jetë dhe një numër i madh tifozësh, të cilët do të ndikojnë jo pak në motivimin e ekipit gjatë gjithë 90 minutave.

FERIZ FERIZAJ-PANORAMASPORT.AL

NDIQE LIVE "PANORAMA TV"

---