Java e dytë e Kategorisë së Parë nis sot me ndeshjen Lushnja-Pogradeci, takim i cili do të luhet në stadiumin “Roza Haxhiu” në orën 17:00. Lushnjarët, nën drejtimin e trajnerit Gugash Magani dhe stafit të tij, kanë përmbyllur dje përgatitje për këtë ballafaqim me liqenorët.

Për të besuarit e trajnerit Magani, ky është prezantimi i parë sezonal para tifozërisë lushnjare, ndaj kërkohet maksimumi në fushë, që në fund duhet të përkthehet në rezultat pozitiv. Trajneri i Lushnjës Gugash Magani ka projektuar një formacion sulmues, por do të mungojë mesfushori Tabaku, për arsye dëmtimi. Pjesa tjetër e skuadrës është e konfirmuar dhe atë që nuk e arritën javën e shkuar në Peshkopi, kërkohet që të finalizohet sot ndaj Pogradecit.

Në një prononcim për “Panorama Sport” në prag të sfidës me pogradecarët, tekniku peqinas i Lushnjës u shpreh: “Pogradeci është një kundërshtar që e vlerësojmë. Ka bërë investime dhe vjen me entuziazmin e rikthimit në Kategorinë e Parë. Ne do të futemi në fushë për ta fituar takimin. Futbolli është i paparashikueshëm, por Lushnja do të futet në fushë për ta fituar takimin, që e luajmë para tifozëve tanë”.

 

Xhabrahimi- Në të njëjtën linjë me trajnerin është edhe sulmuesi Albi Xhabrahimi, i cili iu bashkua Lushnjës në merkaton e verës. “Pogradeci është një skuadër, që nuk duhet nënvlerësuar. Lushnja futet në fushë, për të fituar takimin dhe për të marrë trepikëshin e parë për këtë sezon futbollistik”, tha sulmuesi Xhabrahimi. Lushnjarët e nisën pozitivisht kampionatin me barazimin në Peshkopi. Tani do të shikohet sesi do të shkojnë gjërat në shtëpi, kur do të presin liqenorët. Publiku lushnjar i karikuar pas startit pozitiv mezi pret golat dhe fitoren e parë në kampionat.

Alban Alushi-PANORAMASPORT.AL

NDIQE LIVE "PANORAMA TV"

---