Stërvitje në Pogradec/ Laçi i karikuar para Tiranës, Moriero beson te triumfi i radhës
Fitorja e parë në kampionat kundër Vllaznisë dhe për më tepër në debutimin e trajnerit Françesko Moriero, ka shtuar besimin te Laçi për vazhdimësinë. Sot kurbinasit do të kenë një transfertë të pazakontë, pasi në stadiumin e Korçës kundërshtar nuk do të jetë Skënderbeu vendës, por Tirana si pritëse.
Foto ilustruese/ Laçi në seancë stërvitore
Skuadra e Morieros ka udhëtuar që dje drejt Pogradecit, duke u grumbulluar në një prej hoteleve të këtij qyteti. Edhe stërvitja e fundit është bërë në qytetin liqenor, me Morieron që ka punuar më tepër taktikisht me ekipin. Gjasat janë të vogla që formacioni të ndryshojë dhe ashtu si me Vllazninë, sërish trajneri italian do t’i besojë një vend në sulm 18-vjeçarit nga Bregu i Fildishtë, Nikolas Kofi Kouame, i cili bëri një paraqitje fantastike në takimin e tij të parë si titullar javën e kaluar.
Moriero beson shumë se grupi i lojtarëve do t’i përgjigjet në mënyrën më të mirë. Me skuadrën në Pogradec udhëtuan plot 21 lojtarë, në mënyrë që stafi teknik t’i paraprijë ndonjë surprizë të pakëndshme para ndeshjes.
PANORAMASPORT.AL
NDIQE LIVE "PANORAMA TV"
