Manfredas Ruzgis, me “dopietën” e shënuar në Kukësi, është ngjitur në kuotën e 9 golave, po aq sa edhe Mentor Mazrekaj. Tashmë ai kërkon ta parakalojë atë në takimin kundër Flamurtarit, duke u shënuar vlonjatëve.

Ruzgis ka ndezur ëndrrën e Vorës, por dhe të tifozëve vorakë, për të kapur vendin e parë që këtë javë. Në intervistën e dhënë për “Panorama Sport”, sulmuesi lituanez foli me bindje se Vora jo vetëm që do ta fitojë duelin me Flamurtarin, por edhe ai do të shënojë gol në këtë takim.

Të hënën do të ndesheni me Flamurtarin kryesues. Si e shihni takimin?

Është një takim shumë i fortë. E njoh mirë Flamurtarin, pasi kam luajtur edhe në ndeshjen e fazës së parë kundër tyre në Vlorë. Vora e konsideron si ndeshje radhe, ku duhet të japim maksimumin si ekip për të arritur objektivin e këtij 90-minutëshi, pra marrjen e tri pikëve. Si është gjendja e skuadrës dhe morali para këtij dueli?

Ne vijmë në këtë takim pas dy fitoreve radhazi, 3-1 në Kupë kundër Orikut dhe 4-0 në Kukës për kampionat. Patjetër që kjo ka ndikuar në ngritjen e moralit të skuadrës sonë pas asaj humbje të papritur në Fier. Morali i skuadrës është i lartë, pavarësisht luhatjeve që kemi pasur në dy-tre ndeshje.

Për kundërshtarin, Flamurtarin, çfarë mund të na thoni?

Flamurtari është një kundërshtar i fortë dhe me një grup të mirë lojtarësh. Vora duhet të jetë e motivuar për këtë takim, pasi dueli i së hënës do të jetë vendimtare për objektivin tonë, ngjitje në elitë. Të gjithë duhet të japim maksimumin, rezultatin le t’ia lëmë fushës.

Jeni golashënuesi më i mirë i kampionatit deri tani, së bashku me Mazrekajn. A do t’i shënojë Ruzgis gol edhe Flamurtarit?

Kjo do të jetë përballja ime e dytë ndaj Flamurtarit. Në ndeshjen e parë nuk arrita dot të shënoja gol, pasi ishte fillimi i karrierës sime në Shqipëri dhe s’e njihja kundërshtarin. Tani jam plotësisht i bindur, që unë do të shënoj gol kundër Flamurtarit, njëkohësisht do ta parakaloj rivalin tim Mazrekaj.

Ndeshja luhet në Vorë, cili është mesazhi juaj për tifozërinë vorake?

Tifozëria jonë nuk ka munguar kudo që kemi luajtur. Aq më shumë që kjo është një kryendeshje që kërkon një numër shumë të madh tifozësh. Mesazhi im është që të përkrahin e të mbështesin ekipin e zemrës, pasi ne të gjithë lojtarët jemi betuar se nuk do t’i zhgënjejmë. Ju garantoj se do ta fitojmë këtë ndeshje rivalësh dhe do ta festojmë së bashku ngjitjen në vendin e parë.

ABDULLA DUSHKU- PANORAMASPORT.AL

NDIQE LIVE "PANORAMA TV"

---