Testi i parë, Lushnja mposht Besën në “Roza Haxhiu”
Tri javë pasi kanë zbritur në fushë (10 kor rik), lushnjarët kanë zhvilluar miqësoren e parë të përgatitjeve verore. Skuadra e drejtuar nga Gugash Magani ka fituar 2-1, kundër Besës, në stadiumin “Roza Haxhiu”. Për skuadrën e Mirel Josës është humbja e dytë radhazi në miqësore, pas asaj me liqenorët e Pogradecit.
NDESHJA – Takimi ka nisur në orët e vona të pasdites (17:45), për të evituar të nxehtin e madh. Binte në sy interesimi i madh nga klubi kavajas. Një staf i gjerë që kryesohej nga Kryetari i Bashkisë Kavajë, Fisnik Qosja. Nga ana tjetër publiku lushnjar kishte mbushur plot tribunën qendrore. Interesant është fakti që edhe pse i kanë munguar rezultatet, tifozët e Lushnjës shfaqin interesim të madh për skuadrën.
Me shumë emra të rinj, një skuadër e tjetërsuar, lushnjarët e kanë nisur më mirë takimin. Me kalimin e minutave kanë më të qartë dhe në minutën e 10-të vjen avantazhi. Sulmuesi Albi Xhabrahimi, një ish i Besës e udhëheq mirë topin, hyn në zonë dhe godet shumë saktë duke mposhtur portierin Mehidri. Topi tund rrjetën dhe Lushnja është në avantazh. Besa kërkon barazimin dhe fillon të krijojë raste. Në minutën e 14-të godet Stafa dhe topi përfundon jashtë. Kështu bën edhe në minutën e 37-të. Por, dy minuta më vonë kavajasit barazojnë. Indio Oliveira ndërmerr një aksion personal nga e djathta në qendër. Më pas lëshon një silur duke shënuar në të djathtë të Alimuçajt.
Një “perlë” që fiton duartrokitjet e të pranishmëve. Kështu mbyllet pjesa e parë. Pas pushimit nis rituali i zëvendësimeve. Te Lushnja rikthehet pas 4 sezonesh mbrojtësi Marjus Korreshi. Po në prapavijë aktivizohet edhe Uillfred nga Bregu i Fildishtë. Në minutën e 71-të Besa rrezikon sërish me Stafën, por topi devijohet. Katër minuta para fundit lushnjarët fitojnë një penallti. Nurja rrëzon në zonë sulmuesin Sadiku të aktivizuar në pjesën e dytë. Është vetë sulmuesi 20-vjeçar që godet nga pika e bardhë duke mposhtur portierin zëvendësues Ahmeti. Lushnjarët fitojnë 2- 1, në miqësoren e parë, ndërkohë tjetër humbje për Besën.
ALBAN ALUSHI-PANORAMASPORT.AL
