Lëvizje surprizë në Maqedoninë e Veriut, presidenti i Federatës të Futbollit Maqedonas, Muhamed Sejdini, ka dhënë dorëheqjen, sot pas ndeshjes me Ishujt Faroe, ku përfaqësuesja e tij triumfoi me rezultatin 1-0. 

Sejdini ishte në krye të FFM, prej 7 vitesh, teksa nën drejtimin e tij Maqedonia e Veriut, arriti një sukses historik duke shkuar në Europian.  

Nëpërmjet një postimi në “Facebook”, shqiptari ka bërë me dije se do të jetë në krye deri më 22 dhjetor, kur do të mbahet Kuvendi i Jashtëzakonshëm për të zgjedhur kryetarin e ri. 

Maqedonia e Veriut fitoi edhe sonte ndaj Ishujve Faroe, duke arritur kështu pesë fitore nga pesë ndeshje në Ligën C të Ligës së Kombeve. 

STATUSI I MUHAMED SEJDINIT:  

“Pas 7 viteve të jashtëzakonshme dhe të mbushura me arritje historike, kam vendosur të tërhiqem nga pozita e Presidentit të Federatës së Futbollit të Maqedonisë. Ky vendim vjen si rezultat i reflektimit tim për një moment të përshtatshëm ndryshimi, pas një periudhe që do të mbetet si më e suksesshmja në historinë e futbollit tonë. 

Nën drejtimin tim, së bashku me ju, kemi shkruar kapituj të artë për futbollin e Maqedonisë: kualifikimi historik në Kampionatin Europian EURO 2020, renditja e dytë në grupin kualifikues për Kupën e Botës dhe fitorja e paharrueshme kundër Italisë në Palermo, sukseset e Ligës së Kombeve me kalimin në Ligën B dhe realizimi i projekteve të shumta infrastrukturore në bashkëpunim me UEFA-n dhe FIFA-n. 

E lë këtë pozicion me krenari dhe falënderim të madh për të gjithë ata që kontribuuan në këto arritje: lojtarët, trajnerët, klubet, investitorët, administratën, Komitetin Ekzekutiv (Këshillin Drejtues) dhe çdo dashamirës të futbollit. 

Unë do të vazhdoj të ushtroj rolin tim deri më 22 dhjetor, kur në një Kuvend të Jashtëzakonshëm do të zgjidhet pasardhësi im. 

Me besim të plotë në të ardhmen e Federatës dhe të futbollit tonë, ju falënderoj nga zemra për mbështetjen dhe bashkëpunimin ndër vite”, shkuhet në njoftimin e plotë të Sejdinit. 

PANORAMASPORT.AL

NDIQE LIVE "PANORAMA TV"

---