Vllaznia ka marrë tre pikë shumë të rëndësishme ndaj Laçit me fitoren 2-1 në Shkodër, duke konsoliduar edhe më shumë pozitat në katërshen e parë në një moment ku dëmtimet kanë përgjysmuar skuadrën shkodrane.

Kësaj të fundit i mungonte i gjithë reparti i mbrojtjes në ndeshjen e sotme për shkak dëmtimesh, ndërsa të tjerë iu shtuan në pjesën e parë me Deliun e të riun Spahija që u detyruan të linin fushën për shkak problemesh fizike.

Megjithatë, gjithçka e zgjidhën në pjesën e dytë dy talentet vendas, Dodaj e Delaj, të cilët shënuan në portën e Dajsinanit duke i dhënë një avantazh të dyfishtë shkodranëve. Bullari rihapi ndeshjen për miqtë, të cilët u hodhën në sulm me shumë forca në fund. Por rezultati nuk ndryshoi më dhe për Vllazninë erdhën tre pikë që e çojnë më të qetë drejt ndeshjes së fundit të këtij viti në Superiore.

VLLAZNIA-LAÇI 2-1

52′ Dodaj, 57′ Delaj / 71′ Bullari

NGJARJET KRYESORE

90’+7’ Mbyllet ndeshja me fitoren 2-1 të Vllaznisë.

90’+3’ Probleme fizike me radhë për lojtarët e Vllaznisë, këtë herë është Kristi Qarri që kërkon ndihmën e stafit mjekësor. (VIDEO)

90’+2’ Beci merr vendin e Kahrimanoviç te Vllaznia.

90′ Jepen 5 minuta shtesë.

87’ Ballhysa merr topin në qendër të zonës dhe gjuan, sfera devijohet dhe përfundon në duart e Qarrit. (VIDEO)

85’ Vllaznia e kujdesshme nuk lejon hapësira për kurbinasit, duke u munduar të administrojë minutat.

83’ Tjetër gjuajtje e rrezikshme e Bullarit në zonë që ndalet nga Qarri, aksioni bëhet i pavlefshëm për pozicion jashtë loje.

77’ Gjuajtje e fortë e Bibos nga jashtë zonës, sfera devijohet në fundore.

71’ GOOOL LAÇI! Prodani ul topin me kokë në qendër ku Bullari shfrytëzon pavëmendjen e Bajramit për të kaluar edhe Qarrin e çuar sferën në rrjetën e boshatisur. (VIDEO)

69’ Tresa, Melo dhe Manellari largohen nga radhët e Laçit, për t’i bërë vend Boçkës, Bibos dhe Ballhysës.

67’ Një harkim i rrezikshëm në zonën shkodrane, largohet në këndore nga Pusi.

66′ Edhe Tresa ndëshkohet me karton të verdhë te kurbinasit

63’ Dodaj nga e majta hyn përsëri në zonë, gjuajtja e tij devijohet në rrjetën e jashtme. (VIDEO)

59’ Melo ndëshkohet me karton të verdhë pas një ndërhyrje në mesfushë.

57’ GOOOL VLLAZNIA! Kryeziu humb topin në mesfushë, Delaj merr sferën dhe lëshon një predhë të jashtëzakonshme në kufijtë e zonës, duke dyfishuar shifrat. (VIDEO)

54’ Melo me kokë tenton të gjejë portën, por nuk ka saktësinë për të rrezikuar Qarrin.

52’ GOOOL VLLAZNIA! Dodaj nga e majta shmang Kurtin dhe gjuan me të majtën, duke mposhtur edhe Dajsinanin për t’i dhënë avantazhin skuadrës. (VIDEO)

52’ Kofi i lë vendin Bullarit në radhët e Laçit.

50’ Kofi niset i vetëm drejt zonës por Bajrami e arrin dhe i vjedh kohën duke detyruar sulmuesin të shkaktojë faull. (VIDEO)

46’ Mjaki nis një top interesant drejt Tresës, Bajrami mbyll hapësirën dhe largon topin.

46’ Nis pjesa e dytë pa lëvizje të tjera në formacione.

45’+4’ Mbyllet pa gola pjesa e parë e ndeshjes.

45’+4’ Balaj provon me një goditje dënimi, sfera kalon mbi traversën e portës së miqve.

45’+2’ Mjaki ndëshkohet me karton të verdhë për një mbajtje ndaj Dodajt.

45’ Jepen 3 minuta shtesë.

41’ Delaj merr vendin e Spahijas në radhët e shkodranëve.

39’ Vllaznia e pafat, teksa humb për dëmtim edhe të riun Spahija pas një tërheqje muskulore në këmbën e majtë.

33’ Dodaj shmang mirë Kurtin në të majtën, por pastaj pasimi në qendër largohet nga Lleshi.

29’ Deliu lë lojën i dëmtuar, duke i bërë vend Pusit në radhët e shkodranëve.

29’ Çoba depërton në zonë por pastaj rrezohet, me shkodranët që protestojnë por gjyqtari Beqiri lë lojën të vijojë. (VIDEO)

24’ Shkodranët mundohen të krijojnë një rast të rrezikshëm me një goditje dënimi, Bajrami nuk ia del të kthejë drejt qendrës topin e harkuar në shtyllën e dytë.

18’ Situata zhvendoset shpejt në krahun tjetër ku Tresa gjen hapësirë për të gjuajtur në të djathtën, por Qarri është i gatshëm. (VIDEO)

17’ Dodaj nga e majta provon diagonalen, Dajsinani me këmbë mbyll portën. (VIDEO)

15’ Laçi ekzekuton me skemë një goditje këndi, Prodani nga e majta pason por gjen Qarrin, ndërsa më pas është Spahija i cili largon rrezikun para portës. (VIDEO)

12’ Një kthim mbrapa i Dodajt për të mbyllur hapësirat sjell rrezik në portën shkodrane pasi prekja e tij rrezikon autogolin. (VIDEO)

10’ Balaj tenton një kombinim në zonë me Deliun, por pasimi është shumë i fortë dhe sfera shkon në fundore.

8’ Skuadrat janë shumë të kujdesshme dhe nuk lejojnë hapësira pranë zonës së rreptësisë.

4’ Pas një goditje këndi, Lleshi provon me kokë por nuk gjen portën e Qarrit. (VIDEO)

1’ Ndeshja nis me 12 minuta vonesë, për shkak të problemeve me energjinë elektrike në stadium.

FORMACIONET ZYRTARE

VLLAZNIA: Qarri, Krymi, Bajrami, Spahija, Mala, Sala, Kahrimanoviç, Deliu, Dodaj, Çoba, Balaj.
Trajner: Tomas Brdariç

LAÇI: Dajsinani, Kurti, Lleshi, Opeh, Kryeziu, Prodani, Mjaki, Tresa, Manellari, Melo, Kofi.
Trajner: Françesko Moriero

PANORAMASPORT.AL

NDIQE LIVE "PANORAMA TV"

---