Me dy takime në Grupin B, Kupa e Shqipërisë në volejboll për meshkuj ka kompletuar të shtunën javën e dytë të fazës së grupeve.

Skënderbeu vijon serinë e rezultateve pozitive, teksa mori një fitore të rëndësishme kundër Tiranës. Korçarët dominuan ndaj bardhebluve, duke i shkatërruar me rezultatin 3-0 në pallatin e sportit “Tamara Nikolla”. Skuadrës së Arben Priftit i mjaftuan 1 orë e 16 minuta për ti mbyllur llogaritë, duke futur në kasafortë 3 pikët e radhës, për të forcuar pozitat në vendin e parë. Ndeshja nisi nën diktatin e vendësve, të cilët e komanduan setin e parë nga fillimi e deri në fund, për të fituar 25-20. I dyti filloi më 2 pikët e para për Tiranën, por korçarët rikuperuan menjëherë, duke e marrë setin edhe më thellë, këtë herë 25-17. Kryeqytetasit ishin të pafuqishëm për të reaguar, me Skënderbeun që e kontrolloi lojën edhe në setin e tretë, të cilin e fitoi 25-20, duke vulosur suksesin final 3-0.Në ndeshjen tjetër të Grupit B, Vllaznia mundi Elbasanin me rezultatin 1-3 në pallatin e sportit “Tomorr Sinani”. Shkodranët shpërthyen në setin e parë në shifrat 11-25, ndërsa e dyfishuan epërsinë, duke marrë edhe të dytin 19-25. Vendësit e rihapën takimin, teksa fituan në setin e tretë 25-17, duke ngushtuar në 1-2. Fraksioni i katërt ishte i luftuar, ndërsa pas pikëve shtesë triumfuan kuqeblutë e Artan Kalasë në shifrat 24-26, duke hipotekuar suksesin në një përballje që zgjati 1 orë e 26 minuta. Me këtë fitore Vllaznia parakalon Tiranën në renditje, duke u ngjitur në vendin e dytë, ndërsa Elbasani mbetet i fundit.Për sa i përket Grupit A, Partizani fitoi të premten ndaj Studentin me rezultatin 3-0.

ARTIN LLESHAJ-PANORAMASPORT.AL

NDIQE LIVE "PANORAMA TV"

---