VOLEJBOLL/ Kupa Pavarësia, festojnë Skënderaj dhe Partizani
Federata Shqiptare e Volejbollit në bashkëpunim me atë të Kosovës zhvilluan Kupën Pavarësia në kuadër të festimeve për 112-vjetorin e pavarësisë së Shqipërisë.
Për tri ditë me radhë u luajtën ndeshjet në sallën e Farkës, ku dhe u shpallën edhe ekipet fituese. Në radhët e femrave Kupën Pavarësia 2024 e fitoi Skënderaj. Vajzat nga Kosova mundën dy ekipet e Shqipërisë, fillimisht Skënderbeun në gjysmëfinale me rezultatin 3- 1 dhe më pas Partizanin në finale në shifrat 3-2 (19-25, 20- 25, 25-13, 25-20, 15-11), duke merituar kështu trofeun.
Te meshkujt, për Partizanin pak rëndësi ka nëse bëhet fjalë për kompeticione kombëtare apo mbarëkombëtare, pasi të kuqtë janë si një makineri triumfesh të pastra. Skuadra e Ylli Tomorrit fitoi Kupën Pavarësia, teksa kaloi fillimisht në gjysmëfinale Shkëndijën 3-0 (25-16, 25-13, 25-11), ndërsa dje likuidoi Skënderbeun në finale me rezultatin 3-0 (25-20, 25-13, 25-22) për të ngritur lart trofeun.
PANORAMASPORT.AL
