VOLEJBOLL MESHKUJ/ Start perfekt nga Partizani, Studenti mund 3-2 Skënderbeun
Partizani vijon startin e shkëlqyer në Superligën e volejbollit të meshkujve, teksa të shtunën ka shënuar një tjetër fitore të pastër. Kampionët në fuqi triumfuan kundër Teutës në Durrës me rezultatin 0-3, në një përballje që zgjati 1 orë e 14 minuta.
Seti i parë dhuroi rivalitet deri në pikët 11-12 për Partizanin, me miqtë që ndryshuan marsh, për të fituar më pas 16-25. Diferencat ishin edhe më të mëdha në fraksionin e dytë, ku skuadra e Ylli Tomorrit triumfoi 14- 25. Teuta pati një përmirësim të lehtë në lojën e saj në setin e tretë, por jo aq sa për ta vendosur në dyshim suksesin e kryeqytetasve. Kështu, Partizan fitoi edhe setin e tretë 20-25, duke futur në kasafortë 3 pikët e radhës, për t’u ngjitur i vetëm në krye të tabelës. Raul Sabliqi dhe Ledion Martiro me nga 14 pikë secili, si dhe kapiteni Osman Qepa me 10 ishin pikëshënuesit më të mirë në kampin e kuq. Për Teutën shifrën më të lartë të pikëve e prekën Denis Rama, Asmend Kula dhe Renaldo Bushpepa, me nga 7 pikë secili.
Fitorja e dytë në po kaq ndeshje në kampionat edhe për Studentin, që e ka nisur mjaft mirë sezonin e ri. Kryeqytetasit triumfuan kundër Skënderbeut 3-2, në një sfidë shumë të luftuar që zgjati 2 orë e 10 minuta në “Asllan Rusi”. Takimi nisi më mirë për Skënderbeun, me korçarët që morën setin e parë 23-25. Por vendësit reaguan, duke dominuar në dy setet e radhës, për t’i fituar ato 25- 17 dhe 25-15. Megjithatë korçarët nuk dorëzohen, teksa ftojnë 18-25 në setin e katërt, duke vendosur baraspeshën 2-2, për ta çuar ndeshjen me set final. Kështu beteja sportive në parket vijon edhe në setin e pestë, me të dyja ekipet që luajnë fortë në çdo pikë. Por Studenti tregohet më i saktë në momentet vendimtare, për të fituar setin 15-13 dhe të gjithë ndeshjen 3-2. Bledi Metani me 24 pikë dhe kapiteni Armando Gaxiri me 21 shkëlqyen në sulmin e Studentit, ndërsa për Skënderbeun shënuesi më i mirë ishte Emanuel Driza, autor i 18 pikëve.
Java e dytë do të plotësohet më 25 shtator me takimin Vllaznia-Elbasani, ndërsa Tirana qëndroi pushim për shkak të numrit tek të ekipeve në kampionat.
PANORAMASPORT.AL
