Fitorja e arritur një javë më parë në Shijakut ndaj Erzenit krijoi iluzionin se Korabi do ta kalonte me sukses dhe ndeshjen ndaj Vorës, por ndodhi e kundërta. Miqtë me golin e shënuar nga Avdiu në minutën e katërt, shuan çdo iluzion te të besuarit e trajnerit Canajt.

Miqtë morën një trepikësh të çmuar dhe rrit shpresat për një pozicionim më komod në renditje. Humbja e pësuar mund t’i kushtojë jo pak Korabit.

Ndeshja- Pjesa e parë nis me vendasit në sulm, vorakët në aksionin e parë të ndeshjes gjejnë golin. Minuta 4, pas një kombinimi Kasalla – Geci, ky i fundit nga krahu i majtë i sulmit, jep një top të saktë në qendër të zonës dhe Avdiun në afërsi të portës shënon, 1-0 për Vorën. Pas shënimit të golit, vendasit e shtojnë presionin në portën mike.

Në të 16-të, Kryemadhi nuk e shfrytëzon krosin e Mziut nga këndi. Pas disa minutash presion të vendasve, miqtë zbresin rrezikshëm me Kasallën nga e djathta e sulmit, por mbrojtja dibrane është vigjilente duke larguar rrezikun nga Ruzgis. Në të 23-ën, Peralta në hyje të zonës, në pozicion ballor me portën, për pak sa nuk befason miqtë. Goditjes së tij i bëhet pengesë traversa. Ndërsa në të 31-ën vendasve u anulohet një gol për pozicion jashtë loje, me autor Markun. Pjesa e dytë ka të njëjtën pamje me të parën. Vendasit hidhen në sulm në kërkim të golit të barazimit, por miqtë janë ata që i afrohen në dy momente portës me anë të Kasallës dhe Ruzgis, por që neutralizohen nga mbrojtja dhe portieri Qyrani.

Në të 68-ën vendasit kanë një rast për të barazuar rezultatin. Aksion i tyre nga krahu i majtë i sulmit. Mziu, kroson në qendër të zonës për Çemën, por goditja e tij ishte për t’u harruar. Numrit të rasteve të humbura për vendasit i shtohen dhe dy të tjera respektivisht në të 78-ën dhe të 85-ën me anët të Bucit dhe Kryemadhit, por sulmuesit vendas nuk ishin në ditën e tyre të mirë. Përfundimisht Vora merr një trepikësh me vlerë, ndërsa vendasit “vajtojnë” rastet e humbura dhe mbajnë vendin e nëntë me 5 pikë në pesë javë.

KORABI-VORA 0-1

GOLI: Avdiu 4’

Korabi: Qyrani, Sina (Çomo 79′), Paplekaj, Kurti, Hasa, Andoni (Stana 65′), Mziu, Kryemadhi, Reci( Buci 57′), Peralta(Çema 65′), Marku (Shehu 77′);(Në dispozicion: Alla, Halilaj, Cikani, Ndrejaj, Lushaku). Trajner: Agim Canaj

Vora: Ruçi, Ismaili (Vrapi 90′), Shehi, Sefa, Geci, Aneni, Ntepe (Duka72′), Marinaj, Avdiu (Bardhi 62′), Ruzgis ( Nikqi 61′), Kasalla; (Në dispozicion: Jata, Dalipi, Hasrama, Rushiti). Trajner: Arian Bellai

Kartona të Verdhë: Paplekaj 72’ / Ismaili 90’

Gjyqtarë: B. Dragusha, S. Hysjeni, D. Grimci (Shkodër)

Vëzhgues: Arben Feshti (Durrës)

Delegat: Engjëll Pjetrushi (Lezhë)

Nderim GOCI-PANORAMASPORT.AL

NDIQE LIVE "PANORAMA TV"

---