Xhenoa dhe Juventusi do të përplasin brirët në “Luixhi Ferraris” në orën 18:00 në kuadër të javës së gjashtë të Serisë A. “Zonja e Vjetër” kërkon të rikthehet te fitorja, e cila i mungon prej tre ndeshjesh në kampionat, njësoj si Xhenoa që ka tri javë që nuk po triumfon dot.

Sezonin e kaluar skuadrat u ndanë në barazim në të dyja ndeshjet (1-1 dhe 0-0) dhe të dyja skuadrat nuk kanë regjistruar kurrë tre barazime radhazi përballë njëra-tjetrës në histori. Xhenoa ndërkohë nuk është mposhtur në tre sfidat e fundit nga Juventusi, 2 barazime dhe 1 fitore, rezultate këto që vijnë pas 5 humbjeve radhazi. Vetëm një herë në histori ka arritur Xhenoa që mos mposhtet në katër ndeshje radhazi nga Juventusi gjatë shkurtit 1990 dhe tetorit 1991.

Në 9 ndeshjet e fundit në “Ferraris” ka një ekuilibër mes dy skuadrave me nga 4 fitore secila dhe 1 barazim. Juventusi ka barazuar tri ndeshjet e fundit në kampionat me rezultatin 0-0 dhe nëse edhe kjo ndeshje përfundon kështu, do të ishte një statistikë negative që “Zonja” do ta vendoste për herë të parë në historinë e saj në Serinë A.

Mbrojtësi i Juventusit, Bremer, ka arritur të realizojë dy gola kundër Xhenoas në kampionat dhe të dyja i ka shënuar me kokë. Braziliani ka bërë më mirë vetëm kundër Kaljarit ku ka shënuar 3 gola. Në 6 sezonet e fundit, Bremer është mbrojtësi që ka shënuar më shumë gola me kokë (13) në 5 kampionatet më të rëndësishme europianë.

Sakaq, momenti negativ për Dusan Vlahoviç po thellohet dhe në këtë ndeshje kërkon që të zhbllokohet duke shënuar gol. Serbi ka shënuar vetëm në 1 nga 10 ndeshjet e fundit që ka luajtur në Serie A, atë të javës së dytë përballë Hellas Veronës. Vlahoviç ka arritur t’i shënojë Xhenoas dy gola, por asnjë me fanellën e Juventusit. Dy golat i ka shënuar kur luante te Fiorentina, më janar 2022 dhe prill 2021.

PANORAMASPORT.AL

NDIQE LIVE "PANORAMA TV"

---