Policia ka vënë në pranga dy vëllezër të cilët kanë dhënë dëshmi të rremë në tentativë për të fshehur ngjarjen se nga kush ishin plagosur me thikë.
Ata kanë deklaruar se ishin plagosur nga një konflikt me njëri-tjetrin, por deklaratat kontradiktore kanë bërë që Specialistët për Hetimin e Krimeve të Komisariatit Mallakastër, në bashkëpunim me Prokurorinë të thellonin hetimet dhe si rezultat bënë të mundur zbardhjen e ngjarjes.
Nga hetimet u zbulua se dy vëllezërit 26 dhe 28 vjeç ishin plagosur me thikë nga fqinji i tyre 76 vjeç, i cili po ashtu u arrestua dhe përballet me akuzën “Vrasje me dashje”, e mbetur në tentativë.
Njoftimi i policisë:
Mallakastër/ Dhanë deklaratë të rremë në Polici, për të fshehur ngjarjen, vihen në pranga 2 vëllezërit.
Në pranga dhe shtetasi që për motive të dobta plagosi me mjet prerës dy vëllezërit.
Shërbimet e Komisariatit të Policisë Mallakastër menjëherë pas njoftimit të marrë se në spitalin e Ballshit janë paraqitur 2 shtetas për mjekim, të plagosur me mjet prerës (thikë), kanë shkuar dhe kanë marrë kontakt me shtetasit e plagosur.
Shërbimet e Policisë kanë shoqëruar në Komisariatin e Policisë Mallakastër shtetasit E. P., 28 vjeç, dhe J. P., 26 vjeç (vëllezër), të dy banues në Ballsh, për të dhënë deklaratën mbi ngjarjen e ndodhur. Dy vëllezërit kanë deklaruar se janë konfliktuar me njëri-tjetrin duke fshehur ngjarjen.
Nisur nga deklarimet kontradiktore të dy vëllezërve, Specialistët për Hetimin e Krimeve të Komisariatit të Policisë Mallakastër, në bashkëpunim me Prokurorinë kanë thelluar hetimet dhe si rezultat bënë të mundur zbardhjen e ngjarjes.
Si rezultat i hetimeve të kryera ka rezultuar se këta shtetas janë plagosur me mjet prerës (thikë), për motive të dobëta, nga shtetasi A. B., 76 vjeç, banues në Ballsh, (fqinji i tyre).
Në përfundim të hetimeve u bë arrestimi i shtetasve E. P., 28 vjeç, dhe J. P., 26 vjeç, për veprën penale “Deklaratë e rreme përpara oficerit të policisë gjyqsore”, dhe shtetasit A. B., 76 vjeç për veprën penale “Vrasje me dashje”, e mbetur në tentativë.
Materialet procedurale i kaluan Prokurorisë për veprime të mëtejshme.
NDIQE LIVE "PANORAMA TV" © Panorama.al
