Liderët e BE-së janë mbledhur në Budapest për një samit joformal mbi situatën ekonomike në BE, një detyrë që është shtyrë dhe nga ‘kërcënimi’ i politikave proteksioniste të “Amerikës së Parë” që premtoi presidenti i zgjedhur i SHBA-së, Donald Trump.
Kryeministrja italiane, Giorgia Meloni, është shprehur në takim se Evropa duhet të gjejë një balancë dhe të mos presë të mbështetet te SHBA-ja.
“Mos pyesni se çfarë mund të bëjë SHBA për ju, pyesni se çfarë duhet të bëjë Evropa për veten e saj,” tha kryeministrja italiane, Giorgia Meloni, teksa takimi nisi. “Evropa duhet të gjejë një balancë. E dimë se çfarë duhet të bëjmë.”, tha ajo.
Zyrtarët evropianë janë të shqetësuar për rikthimin e Trump, jo vetëm për shkak të armiqësisë së tij ndaj NATO-s dhe qëndrimeve ndaj Ukrainës, por gjithashtu për pasojat ekonomike të kërcënimit të tij për t’i bërë BE-së “të paguajë një çmim të madh” për mos blerjen e mjaftueshme të importeve amerikane.
Liderët do të përqendrohen në diskutimin e një serie reformash radikale të propozuara në një raport të madh të publikuar në shtator nga ish-kryeministri italian dhe kryetari i Bankës Qendrore Evropiane, Mario Draghi, i cili paralajmëroi se blloku mund të përballej me një rënien të ngadaltë dhe të mundimshme, nëse nuk vepronte shpejt dhe vendosmërisht, shkruan The Guardian.
Përgjigjja e BE-së ndaj vështirësive të saj ekonomike dhe rizgjedhjes së Trump, është e penguar nga fakti se dy fuqitë më të mëdha të bllokut janë dobësuar nga krizat politike në vendet e tyre. Qeveria e koalicionit të Gjermanisë u shemb të mërkurën, ndërsa presidenti i Francës, Emmanuel Macron, nuk ka shumicë parlamentare.
Duke thënë se pandemia e Covid-it dhe lufta në Ukrainë kanë ndryshuar rregullat e tregtisë ndërkombëtare në dëm të BE-së, raporti i Draghi kërkoi një investim masiv prej 800 miliardë euro në vit për ekonominë e bllokut, ekuivalente me rreth 5% të prodhimit ekonomik vjetor të BE-së.
Propozimet e Draghi për financimin e investimeve urgjente përfshinin më shumë huamarrje të përbashkët, një mundësi që është e papranueshme për kombet më “të kursyera” të bllokut, si Gjermania dhe Holanda.
Draghi, i cili pritej të paraqiste raportin e tij në detaje për 27 kryetarët e shtetit dhe qeverisë të BE-së që do të merrnin pjesë në samit, tha se blloku nuk mund ta shtynte më përballjen me vendime thelbësore, duke shtuar se ndjenja e urgjencës sot është më e madhe se sa ishte një javë më parë.
“Kemi shtyrë shumë vendime të rëndësishme për të gjetur konsensus mes shteteve anëtare të BE-së,” tha Draghi për gazetarët. “Ky konsensus nuk erdhi dhe si rezultat kemi pësuar rritje më të ulët ekonomike.”
Ai tha se huamarrja e përbashkët, e ndërmarrë për herë të parë nga blloku për të financuar fondet e rikuperimit nga pandemia, do të ishte e domosdoshme.
Me ekonominë më të madhe të Europës, që ka gjasa të jetë e ngërthyer në një lëmsh politik për disa muaj të tjerë, diplomatët thanë se kishte pak shpresë për adoptimin e ndonjë hapi konkret për të stimuluar ekonominë e Europës në të ardhmen e afërt.
NDIQE LIVE "PANORAMA TV" © Panorama.al
